ھەسەدە سیناریۆکانی په‌لاماردانى ڕۆژئاوای كوردستان ئاشكرا ده‌كات

زارنیوز/

لەگەڵ زیادبونی لێدوانە هەڕەشەئامێزەکانی گەورە بەرپرسانی تورکیا بۆ ئەنجامدانی هێرشی سەربازیی دژ بەهێزەکانی سوریای دیموکرات‌و گواستنەوەی سەربازو چەک‌و تەقەمەنی بەرەو ناو خاکی سوریا، بەرپرسێکی سەر بەهێزەکانی سوریای دیموکرات دوو سیناریۆ بۆ ئەگەری ئۆپەراسیۆنە گریمانکراوەکەی تورکیا دژ بەڕۆژئاوای کوردستان ئاشكراده‌كات.

ڕێزان حەدۆ وتەبێژی پێشوی هێزەکانی خۆپاراستن لەعەفرین لەچاوپێکەوتنێکیدا لەگەڵ ئاژانسی "سپۆتنیک"ی ڕوسیی وتویه‌تى، "ئەگەربێت‌و هەر ئۆپەراسیۆنێکی سەربازیی نوێی تورکیا بۆسەر ڕۆژئاوای کوردستان ئەنجامبدرێت‌و بەڕەزامەندیی یان چاوپۆشیی لایه‌نە کاریگەرەکانی دۆسیەی سوریا بێت، ئەوە بارودۆخەکە بەوجۆرە دەبێت كه‌ دوو سیناریۆ له‌ئارادایه‌".

به‌وته‌ى ئه‌و، "سیناریۆى یه‌كه‌م، تورکیا ڕێگای ئێم 4 واتە ڕێگای حەلەب-لازقییە بۆ ڕوسیاو دیمەشق دەستەبەردەکات‌و گروپە چەکدارییە سورییەکان لەناوچەکانی باشوری ئۆستراد دەکێشێتەوە".

بەوتەی بەرپرسەکەی ڕۆژئاوای کوردستان، "لەبەرامبەردا تورکیا لەقۆناغی یەکەمدا هێرشدەکاتەسەر هەندێک گوندی گوندەواری باکوری حەلەب کەلەژێر کۆنترۆڵی هەسەدەدایە وەک (شێخ عیساو بنکەی ئاسمانیی مینگ‌و مەرعەناز)، ئەگەربێت‌و کەناڵە دیبلۆماسییەکان سەرکەوتوبون ئەوە تەلرەفعەت لەدەرەوەی حساباتەکاندا دەبێت‌و لەئێستادا هێرشی ناکرێتەسەر".

دەشڵێت:"لەو قۆناغەدا ئۆپەراسیۆنی سەربازیی سەرەکیی تورکیا بۆسەر عەین عیسا دەبێت، ئەویش بەمەبەستی ئەوەی ناوچەکانی ژێر کۆنترۆڵی هێزەکانی سوریای دیموکرات لەیەکتر داببڕێت واتە (ناوچەی حەسەکەو کۆبانێ) لەیەکتر دادەبڕێت".

ئاماژەی بەوەشکردوە، "تورکیا لەقۆناغی دوەمدا هێرشدەکاتەسەر کۆبانێ، بەوەش تورکیا ناوچەکانی ئۆپەراسیۆنی کانی ئاشتیی‌و قەڵغانی فورات بەیەکەوە دەبەستێتەوە".

سەبارەت بەوەی ئەگەرهات‌و تورکیا لەلایەن ڕوسیاو ئەمریکاوە گڵۆپی سەوزی بۆ ئەنجامدانی هێرشی وشکانیی بۆسەر ڕۆژئاوای کوردستان بۆ هەڵنەکرێت، له‌دوه‌م سیناریۆدا، ئەوە ئەنکەرە پرۆسەی بەئامانجگرتنی کەسایەتییە دیارە سەربازیی‌و مەدەنییەکانی ئیدارەی خۆسەر چڕدەکاتەوە، ئەگەرهات‌و لەبەرامبەردا هەسەدە پەرچەکرداری نواندو پەلاماری خاڵ‌و پێگە سەربازییەکانی تورکیایدا، ئەوە ئەنکەرە ئەوە دەکاتە پاساو بۆ ئەنجامدانی ئۆپەراسیۆنی سەربازیی دژ بەهەسەدە.

41